Er í banka.......ekki banka.

Þar sem ég er auðnuleysingi og töluvert góður í því hef ég nægan tíma til að fylgjast með umhverfi mínu. Er reyndar ekki atvinnuaumingi af eigin hvötum svo ég leitist nú við að rétta minn hlut pínulítið. En alla vega góður í því. Vegna þessa ástands míns er mér oft boðið í bíltúra af vini mínum og félaga sem sendist með skurðgröfur og aðra smáhluti víða um Jótland. Þetta eru skemmtilegir túrar með spjalli og galsa eins og um árið, þegar ég hafði tennurnar og hárið, og ég var maður fyrir því að stýra vinnuvélum og aka vörubílum, ekki bara að klóra mér þar sem pungurinn var svo ég vitni nú í orðasmiðju föður míns. Við fórum beinustu leið niður á höfn í Aarhus og þar beið okkar skurðgrafa sem hafði komið með ferju frá Kalundborg. Svo var strauið tekið upp Randersvej aftur með vélina á vagninum. Þá gerist það allt í einu að það fyllist bókstaflega allt af lögreglu og lögreglubílum. Mér varð um og ó. Minnugur þess að 1973 hnuplaði ég lakkrís í Staðaskála og 1979 svindlaði ég mér í strætó í Reykjavík. Nú væri líklega komið að skuldadögum. Ég var eins og guð í framan meðan við ókum í gegnum þvöguna. Svo sáum við, mér til mikils léttis að þetta vara bara bankarán í Nordea útibúinu við Randersveg, útibúinu mínu. Auðvitað á ekkert að gantast með svona grafalvarleg mál og ég veit auðvitað ekkert hvað gekk á......ofbeldi eða hvað. En ég get ekki varist þeirri skemmtilegu hugsun að ræningjunum hafi tekist að ræna skuld minni við bankann. Það myndi leysa mikið af mínum málum. Annað er að ráðgjafi minn er liðlega fimmtugur, ljóshærður(nylon), skemmtilegur og stórfurðulegur maður með góðan húmor. Ég get ekki beðið eftir að hitta hann og fá lýsingar af ráninu og hvort ekki hafi lekið svitadropi undan húfunni eins og hann sjálfur kallar nylonhárið sitt. Nú bíð ég bara eftir fréttunum.....

Athugasemdir

[Hrönn Sigurðardóttir, 21.8.2009 kl. 10:32]

heheheh það væri náttúrulega ferlega frábært ef þeir hefðu rænt skuldum þínum

[S. Lúther Gestsson, 21.8.2009 kl. 11:24]

Óborganlegur.

Farðu til ráðgjafans þíns í bankanum og bjóddu fram aðstoð þína við að lána þeim fyrir skemmdum og öðru. Þú biður hann bara að millifæra á þig, svo lánarðu þeim til baka og svo...Æji man ekki hvernig þeir gerðu þetta hérna heima. Held þetta heiti kúlulán, eitthvað svoleiðis.

En ég trúi því að þú hafir verið hræddur, vonandi fannstu nærfata búð í grenndinni.

[Rut Sumarliðadóttir, 21.8.2009 kl. 11:38]

Þú stalst brandaranum mínum! Ekki banka er í banka er minn prívat og persónulega eftir hrun...

[Gulli litli, 21.8.2009 kl. 14:02]

Hrönn; Hafi þeim tekist að ræna skuldum mínum.....þá er búið að skila þeim því, ólánsmennirnir náðust....

S. Luther; Ég óttaðist það einmitt að loksins hefði ég ráð á nýjum nærbuxum en það verður bara að þvo þær gömlu....Tyggjókúlulán er góð hugmynd.

Rut; Brandaranum er hér með skilað......er í banka......ekki banka..